పట్టణ మౌలిక వసతులకు రూ.25 కోట్లు.. పలాస-కాశీబుగ్గకు కీలక ముందడుగు
పలాస: పలాస-కాశీబుగ్గ మున్సిపాలిటీ అభివృద్ధికి రాష్ట్ర ప్రభుత్వం కీలక నిర్ణయం తీసుకుంది. పట్టణ మౌలిక సదుపాయాల అభివృద్ధి కోసం హైబ్రిడ్ యాన్యుటీ మోడల్ (HAM) పథకం ద్వారా సుమారు రూ.25 కోట్ల విలువైన అభివృద్ధి పనులకు ముఖ్యమంత్రి నారా చంద్రబాబు నాయుడు వర్చువల్ విధానంలో శంకుస్థాపన చేశారు.
ఈ కార్యక్రమంలో పలాస ఎమ్మెల్యే గౌతు శిరీష పాల్గొన్నారు. ఈ సందర్భంగా ఆమె మాట్లాడుతూ.. పలాస-కాశీబుగ్గ మున్సిపాలిటీ అభివృద్ధికి రూ.25 కోట్ల విలువైన పనులు మంజూరు కావడం పట్ల హర్షం వ్యక్తం చేశారు.
పెరుగుతున్న పట్టణ అవసరాలకు అనుగుణంగా మౌలిక సదుపాయాలను బలోపేతం చేయడమే ప్రభుత్వ లక్ష్యమని ఎమ్మెల్యే తెలిపారు. రహదారులు, డ్రైనేజీ, పారిశుద్ధ్యం, పట్టణ రవాణా, ఇతర ప్రాథమిక వసతుల అభివృద్ధికి ప్రాధాన్యత ఇవ్వాలని అధికారులకు సూచించారు.
అభివృద్ధి పనులు నిర్ణీత కాలవ్యవధిలో ప్రారంభించి వేగంగా పూర్తి చేయాలని, నిర్మాణ పనుల్లో నాణ్యతా ప్రమాణాలను తప్పనిసరిగా పాటించాలని గౌతు శిరీష స్పష్టం చేశారు. ప్రజలకు దీర్ఘకాలికంగా ఉపయోగపడేలా పనులు చేపట్టాలని అధికారులను కోరారు.
పలాస-కాశీబుగ్గ మున్సిపాలిటీని ప్రణాళికాబద్ధంగా అభివృద్ధి చేసి, ప్రజలకు మెరుగైన పట్టణ సేవలు అందించేందుకు ప్రభుత్వం చర్యలు తీసుకుంటోందని ఎమ్మెల్యే పేర్కొన్నారు.
పలాస నియోజకవర్గ అభివృద్ధికి సహకరిస్తున్న ముఖ్యమంత్రి చంద్రబాబు నాయుడు, రాష్ట్ర ప్రభుత్వానికి ఆమె కృతజ్ఞతలు తెలిపారు. రూ.25 కోట్ల అభివృద్ధి పనులకు శంకుస్థాపన పట్టణ అభివృద్ధిలో మరో కీలక అడుగుగా నిలుస్తుందని గౌతు శిరీష పేర్కొన్నారు.
ఈ కార్యక్రమంలో మున్సిపల్ అధికారులు, ప్రజాప్రతినిధులు, సంబంధిత శాఖల అధికారులు, కూటమి నాయకులు, కార్యకర్తలు, స్థానిక ప్రజలు పాల్గొన్నారు.