పెద్లకొజ్జిరియా విద్యుత్ సమస్యల పరిష్కారానికి వినతి
గ్రీవెన్స్లో ఉన్నతాధికారులకు వినతిపత్రం సమర్పించిన మాజీ సర్పంచ్ రామ్కుమార్
KANCHILI : కంచిలి మండలం పెద్లకొజ్జిరియా గ్రామంలో నెలకొన్న విద్యుత్ సమస్యలను తక్షణమే పరిష్కరించాలని కోరుతూ మాజీ సర్పంచ్ రామ్కుమార్ శనివారం కంచిలి మండల పరిషత్ కార్యాలయంలో నిర్వహించిన గ్రీవెన్స్ కార్యక్రమంలో విద్యుత్ శాఖ ఉన్నతాధికారులకు వినతిపత్రం సమర్పించారు.
గ్రామంలోని పలు ప్రాంతాల్లో తక్కువ వోల్టేజ్, తరచూ విద్యుత్ సరఫరా అంతరాయాలు, దెబ్బతిన్న విద్యుత్ స్తంభాలు, వంగిపోయిన విద్యుత్ తీగలు, లోపభూయిష్ట ట్రాన్స్ఫార్మర్ల కారణంగా ప్రజలు తీవ్ర ఇబ్బందులు ఎదుర్కొంటున్నారని వినతిపత్రంలో పేర్కొన్నారు. ముఖ్యంగా రైతులు వ్యవసాయ పనులు నిర్వహించడంలో, విద్యార్థులు చదువులు కొనసాగించడంలో ఇబ్బందులు ఎదుర్కొంటున్నారని అధికారుల దృష్టికి తీసుకెళ్లారు.
వర్షాకాలం నేపథ్యంలో ప్రమాదకరంగా మారిన విద్యుత్ స్తంభాలు, తీగలను వెంటనే మరమ్మతు చేయడంతో పాటు అవసరమైన ప్రాంతాల్లో కొత్త విద్యుత్ స్తంభాలు ఏర్పాటు చేయాలని కోరారు. గ్రామంలో విద్యుత్ పంపిణీ వ్యవస్థను బలోపేతం చేసి ప్రజలకు నాణ్యమైన, నిరంతరాయ విద్యుత్ సరఫరా అందించేందుకు చర్యలు చేపట్టాలని విజ్ఞప్తి చేశారు.
గ్రామ ప్రజలు ఎదుర్కొంటున్న సమస్యలను పరిగణనలోకి తీసుకుని విద్యుత్ శాఖ అధికారులు క్షేత్రస్థాయిలో పరిశీలన నిర్వహించి శాశ్వత పరిష్కారం చూపాలని రామ్కుమార్ కోరారు. వినతిపత్రాన్ని స్వీకరించిన అధికారులు సమస్యలను పరిశీలించి తగిన చర్యలు తీసుకుంటామని హామీ ఇచ్చినట్లు తెలిపారు.