విద్యార్థి ప్రతిభకు యాదవ సంఘం ఘన సన్మానం.
బూరగాంలో అభినందన సభ.
మెమెంటో, నగదు బహుమతితో విద్యార్థికి సత్కారం.
కంచిలి: ప్రతిభను గుర్తించి ప్రోత్సహించడం ద్వారా విద్యార్థుల్లో ఆత్మవిశ్వాసం పెంపొందడంతో పాటు సమాజాభివృద్ధికి బాటలు పడతాయని వక్తలు పేర్కొన్నారు. శ్రీకాకుళం జిల్లాకు చెందిన యాదవ ఉద్యోగుల సేవా సంఘం సభ్యుడు మడ్డు తిరుపతిరావు మాస్టర్ ఆధ్వర్యంలో కంచిలి మండలం బూరగాం గ్రామంలో ప్రతిభావంత విద్యార్థి బొట్ట శ్రీకర్కు అభినందన సభ నిర్వహించి ఘనంగా సన్మానించారు.
విద్యా రంగంలో విశేష ప్రతిభ కనబర్చిన శ్రీకర్ను గ్రామ యాదవ సంఘం పెద్దలు, యువకులు కలిసి మెమెంటో, నగదు బహుమతి అందజేసి, దుశ్శాలువతో సత్కరించారు. ఈ సందర్భంగా మాట్లాడిన వక్తలు విద్యార్థుల్లో పోటీతత్వం, కృషి, క్రమశిక్షణ పెంపొందితే ఉన్నత లక్ష్యాలను సాధించడం సులభమవుతుందని పేర్కొన్నారు. ప్రతిభను గుర్తించి ప్రోత్సహించడం ద్వారా మరింత మంది విద్యార్థులు స్ఫూర్తి పొందుతారని అభిప్రాయపడ్డారు.
సన్మానానికి స్పందించిన బొట్ట శ్రీకర్ మాట్లాడుతూ, పాఠాలను అర్థం చేసుకుంటూ చదవడం వల్లే మంచి ఫలితాలు సాధించగలిగానని తెలిపారు. ప్రతి సబ్జెక్టును ఆసక్తితో అభ్యసిస్తే చదువు సులభంగా మారుతుందని, లక్ష్యసాధనకు నిరంతర శ్రమ అవసరమని అన్నారు.
ఈ సందర్భంగా వక్తలు ఇటీవల శ్రీకాకుళంలో నిర్వహించిన యాదవ విద్యా–వైజ్ఞానిక చైతన్య సదస్సును ప్రస్తావించారు. జిల్లా వ్యాప్తంగా విద్య, ఉద్యోగ, సామాజిక రంగాల్లో ప్రతిభ కనబర్చిన యాదవ కులానికి చెందిన ఆణిముత్యాలను యాదవ ఉద్యోగుల సేవా సంఘం ఆధ్వర్యంలో ఘనంగా సన్మానించినట్లు తెలిపారు. సంఘం అధ్యక్షుడు డొక్కరి ధనుంజయరావు, ప్రధాన కార్యదర్శి కొర్రాయి రామారావు, నర్తు సోమేష్, మామిడి శ్రీనివాసరావు, మడ్డు తిరుపతిరావు మాస్టర్ తదితరులు విద్యా ప్రోత్సాహం కోసం నిరంతరం కృషి చేస్తున్నారని కొనియాడారు. విద్యార్థులను ప్రోత్సహించడం ద్వారా సమాజంలో విద్యాపట్ల చైతన్యం మరింత పెరుగుతుందని పేర్కొన్నారు.
కార్యక్రమంలో మాజీ సర్పంచ్ ప్రతినిధి మడ్డు వెంకటేశ్వరరావు, బద్రి ఢిల్లీరావు, మద్దిల భీమారావు, బద్రి నాగేశ్వరరావు, మడ్డు అభి, బొట్ట ఉమాపతి, బద్రి లోకనాథం, మద్దిల యోగీశ్వరరావు, బొట్ట వల్లభరావు, బొట్ట గంగారావు, బొట్ట ధర్మారావు తదితర యాదవ సంఘం పెద్దలు, యువకులు పాల్గొన్నారు.