రైతు సంక్షేమమే ప్రభుత్వ లక్ష్యం: టీడీపీ మండల అధ్యక్షులు మాదిన రామారావు.
పెద్ద శ్రీరాంపురం ఆర్బీకేలో 50% రాయితీపై కట్టెజనము విత్తనాల పంపిణీ.
రాయితీ పథకాలను సద్వినియోగం చేసుకోవాలని రైతులకు పిలుపు.
KANCHILI : రైతుల సంక్షేమం, వ్యవసాయాభివృద్ధే ప్రభుత్వ ప్రధాన లక్ష్యమని, రైతులకు అందుబాటులో ఉన్న రాయితీ పథకాలను సద్వినియోగం చేసుకోవాలని టీడీపీ కంచిలి మండల అధ్యక్షులు మాదిన రామారావు పిలుపునిచ్చారు. కంచిలి మండలం పెద్ద శ్రీరాంపురం రైతు సేవా కేంద్రంలో శుక్రవారం 50 శాతం రాయితీపై కట్టెజనము విత్తనాల పంపిణీ కార్యక్రమం నిర్వహించారు. ఈ కార్యక్రమానికి హాజరైన మాదిన రామారావు రైతులకు విత్తనాలను స్వయంగా పంపిణీ చేశారు.
నాణ్యమైన విత్తనాలతో మెరుగైన దిగుబడులు- శాస్త్రీయ సాగుపై రైతులకు అవగాహన:
ఈ సందర్భంగా ఆయన మాట్లాడుతూ, నాణ్యమైన విత్తనాలు, శాస్త్రీయ సాగు విధానాలు రైతులకు మెరుగైన దిగుబడులు అందించడంలో కీలక పాత్ర పోషిస్తాయని అన్నారు. వ్యవసాయ రంగాన్ని మరింత బలోపేతం చేసేందుకు ప్రభుత్వం పలు కార్యక్రమాలను అమలు చేస్తోందని తెలిపారు. రైతులు రాయితీ పథకాలను వినియోగించుకుని వ్యవసాయాన్ని లాభదాయకంగా మార్చుకోవాలని సూచించారు.
కట్టెజనము సాగుపై ఉద్యాన శాఖ అవగాహన-ఆధునిక పద్ధతులతో అధిక దిగుబడి సాధ్యం:
ఉద్యానవన శాఖ సహాయకుడు గంగరాజు మాట్లాడుతూ కట్టెజనము సాగులో అనుసరించాల్సిన శాస్త్రీయ పద్ధతులు, విత్తనాల వినియోగం, పంట సంరక్షణ చర్యలపై రైతులకు అవగాహన కల్పించారు. ఆధునిక వ్యవసాయ పద్ధతులను పాటించడం ద్వారా అధిక దిగుబడులు సాధించవచ్చని వివరించారు. ఈ కార్యక్రమంలో గ్రామ పెద్దలు, రైతులు, స్థానిక నాయకులు, రైతు సేవా కేంద్రం సిబ్బంది తదితరులు పాల్గొన్నారు. రాయితీపై విత్తనాలు అందజేయడంపై రైతులు హర్షం వ్యక్తం చేశారు.